Badlaa...

Badlaa badlaa cheekhun chillaaun, badle ke badle main kya paaun...

Yeh antheen hai badlaa, jismein kitne hee jhulaste hain
iss jhulasan ko iss uljhan ko, jaane kaise main suljhaaun

Jo chala gaya, woh mera thha, jo jaayega woh tera
Aage jaane waale tere meron ko kaise main bachaaun

Kuch dehshatgard, kuch nafratgard hum par kitne hain bhari
yeh baat na maine samjhi, toh kaise tujhko samjhaaun

Ik samay thha jab tune maine, sang ladi thhi ek ladaai
woh samay jo ab nahin raha, kaise usko lautaaun

Badlaa badlaa cheekhun chillaaun, badle ke badle main kya paaun...

Kash-ma-kash

Kaisi kahmakash hai yeh zindagi meri

Sab kuch hai, par lagta hai kuch bhi nahin

Ek chhor se doosre chhor, mein simti

Lagatar bhag daud mein phansi zindagi meri

Mere apne, mere sagge, kehte tu humara na hua

Kis kis ko samjhaaun main ahemiyat meri

Kya kiya maine, aur kya na kiya maine

Inn sawaalon mein phansi, ab toh yeh hasti meri

Ae khuda tune toh sab dekha, sab jaana

Tu hee sudhaar ya le le Zindagi meri...